2. ตีณุปฺปลมาลิยตฺเถรอปทานํ
[11]
‘‘จนฺทภาคานทีตีเร , อโหสิํ วานโร ตทา;
อทฺทสํ วิรชํ พุทฺธํ, นิสินฺนํ ปพฺพตนฺตเรฯ
[12]
‘‘โอภาเสนฺตํ ทิสา สพฺพา, สาลราชํว ผุลฺลิตํ;
ลกฺขณพฺยญฺชนูเปตํ, ทิสฺวา อตฺตมโน อหุํฯ
[13]
‘‘อุทคฺคจิตฺโต สุมโน, ปีติยา หฏฺฐมานโส;
ตีณิ อุปฺปลปุปฺผานิ, มตฺถเก อภิโรปยิํฯ
[14]
‘‘ปุปฺผานิ อภิโรเปตฺวา, วิปสฺสิสฺส มเหสิโน;
สคารโว ภวิตฺวาน [คมิตฺวาน (สี.), นมิตฺวาน (ก.)], ปกฺกามิํ อุตฺตรามุโขฯ
[15]
‘‘คจฺฉนฺโต ปฏิกุฏิโก, วิปฺปสนฺเนน เจตสา;
เสลนฺตเร ปติตฺวาน [ปปติตฺวา (สฺยา. ก.)], ปาปุณิํ ชีวิตกฺขยํฯ
[16]
‘‘เตน กมฺเมน สุกเตน, เจตนาปณิธีหิ จ;
ชหิตฺวา มานุสํ เทหํ [ปุริมํ ชาติํ (?) อุปริ 38 วคฺเค ตติยาปทาเน เอวเมว ทิสฺสติ], ตาวติํสมคจฺฉหํฯ
[17]
‘‘สตานํ ตีณิกฺขตฺตุญฺจ, เทวรชฺชํ อการยิํ;
สตานํ ปญฺจกฺขตฺตุญฺจ, จกฺกวตฺตี อโหสหํฯ
[18]
‘‘เอกนวุติโต กปฺเป, ยํ ปุปฺผมภิปูชยิํ;
ทุคฺคติํ นาภิชานามิ, พุทฺธปูชายิทํ ผลํฯ
[19]
‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ
อิตฺถํ สุทํ อายสฺมา ตีณุปฺปลมาลิโย [ติอุปฺปลมาลิโย (สี.)] เถโร อิมา คาถาโย อภาสิตฺถาติฯ
ตีณุปฺปลมาลิยตฺเถรสฺสาปทานํ ทุติยํฯ
3. ธชทายกตฺเถรอปทานํ
[20]
‘‘ติสฺโส นาม อหุ สตฺถา, โลกเชฏฺโฐ นราสโภ;
ตโยปธิกฺขเย [ตสฺโสปธิกฺขเย (สี.)] ทิสฺวา, ธชํ อาโรปิตํ มยาฯ
[21]
‘‘เตน กมฺเมน สุกเตน, เจตนาปณิธีหิ จ;
ชหิตฺวา มานุสํ เทหํ, ตาวติํสมคจฺฉหํฯ
[22]
‘‘สตานํ ตีณิกฺขตฺตุญฺจ, เทวรชฺชํ อการยิํ;
สตานํ ปญฺจกฺขตฺตุญฺจ, จกฺกวตฺตี อโหสหํฯ
[23]
‘‘ปเทสรชฺชํ วิปุลํ, คณนาโต อสงฺขิยํ;
อนุโภมิ สกํ กมฺมํ, ปุพฺเพ สุกตมตฺตโนฯ
[24]
‘‘ทฺเวนวุเต อิโต กปฺเป, ยํ กมฺมมกริํ ตทา;
ทุคฺคติํ นาภิชานามิ, ธชทานสฺสิทํ ผลํฯ
[25]
‘‘อิจฺฉมาโน จหํ อชฺช, สกานนํ สปพฺพตํ;
โขมทุสฺเสน ฉาเทยฺยํ, ตทา มยฺหํ กเต ผลํฯ
[26]
‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ
อิตฺถํ สุทํ อายสฺมา ธชทายโก เถโร อิมา คาถาโย อภาสิตฺถาติฯ
ธชทายกตฺเถรสฺสาปทานํ ตติยํฯ
4. ติกิงฺกณิปูชกตฺเถรอปทานํ
[27]
‘‘หิมวนฺตสฺสาวิทูเร, ภูตคโณ นาม ปพฺพโต;
ตตฺถทฺทสํ ปํสุกูลํ, ทุมคฺคมฺหิ วิลคฺคิตํฯ
[28]
‘‘ตีณิ กิงฺกณิปุปฺผานิ, โอจินิตฺวานหํ ตทา;
หฏฺโฐ หฏฺเฐน จิตฺเตน, ปํสุกูลํ อปูชยิํฯ
[29]
‘‘เอกตฺติํเส อิโต กปฺเป, ยํ กมฺมมกริํ ตทา;
ทุคฺคติํ นาภิชานามิ, ติณฺณํ ปุปฺผานิทํ ผลํฯ
[30]
‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ
อิตฺถํ สุทํ อายสฺมา ติกิงฺกณิปูชโก เถโร อิมา คาถาโย อภาสิตฺถาติฯ
ติกิงฺกณิปูชกตฺเถรสฺสาปทานํ จตุตฺถํฯ